စစ်ဒဏ်ထိ ကျောက်မဲလူထုအရေးအလေးထားဖို့ လက်နက်ကိုင်တပ်ဖွဲ့အား SNLD ဗဟိုဦးစီးအဖွဲ့ဝင် တိုက်တွန်း (ဆက်သွယ်မေးမြန်းချက်)



သျှမ်းပြည်မြောက်ပိုင်း ကျောက်မဲမြို့နယ်ထဲမှာ ဖြစ်ပွါးနေတဲ့  TNLA တအာင်းတပ်ဖွဲ့နဲ့ RCSS သျှမ်းတပ်ဖွဲ့  ကြားက တိုက်ပွဲတွေကြောင့် ကျေးလက်ရွာသား ၁၀၀၀ ကျော်ဟာ ဖေဖော်ဝါရီလ ၁၀ ရက်က မြို့ပေါ်ကို စစ်ဘေးရှောင်နေရပါတယ်။ ဒါ့အပြင် ရွာကနေ မထွက်နိုင်ဘဲ ပိတ်မိနေတဲ့ရွာသား ၂၀၀၀ လောက် ကျန်နေသေးတယ်လို့ သိရပါတယ်။ အကြောင်းစုံကို သိရအောင် သျှမ်းတိုင်းရင်းသားများဒီမိုကရေစီ အဖွဲ့ချုပ် ဗဟိုဦးစီးအဖွဲ့ဝင် စိုင်းသန်းမောင်ကို သျှမ်းသံတော်ဆင့်က ဆက်သွယ်မေးမြန်းထားပါတယ် ။

 ကျောက်မဲမြို့သို့ရောက်လာသော စစ်ဘေးရှောင်များ(ဓါတ်ပုံ-Sao Mong)

မေး ။ ။ မနေ့က ကျောက်မဲကို ရောက်လာတဲ့ စစ်ဘေးရှောင်ဘယ်လောက်လောက်ရှိပါသလဲရှင့် ။


ဖြေ ။ ။ မနေ့က (ဖေဖော်ဝါရီ ၁၀ ရက်နေ့ ညနေ) အထိ စစ်ဘေးရှောင်စခန်း ၃ နေရာရှိတာ လူဦးရေ ၈၀၀ ကျော်ပါတယ် ။  ဒီကနေ့ ထပ်ပြီး ၁၅၀၀ လောက်လာပါမယ် ။


မေး ။ ။ စစ်ဘေးရှောင်စခန်း ၃ နေရာဆိုတာက ဘယ်မှာလဲ ။


ဖြေ ။ ။ ကျောက်မဲ ဘိုးဘွားရိပ်သာမှာတနေရာ။ ၃၀၀ ကျော်ရှိတယ်။ သီဟိုဠ်ဘုန်းကြီးကျောင်းမှာ ၃၀၀ ကျော်ရှိတယ် ။ အောင်ဆုပန်ဆရာတော်ကျောင်းမှာလဲတချို့ရှိတယ် ။ နမ့်စလင်းကျောင်းမှာလဲ ရှိတယ် ။ ကျောင်းဟိုနမ့်မှာလည်း တချို့ရှိတယ် ။


မေး ။ ။ စစ်ဘေးရှောင်တွေက ……… ။


ဖြေ ။ ။ ပလောင်နဲ့ သျှမ်း တဝက်စီပါတယ် ။


မေး ။ ။ စစ်ဘေးရှောင်တွေကိုသွားပြီး ကူညီထောက်ပံ့တာရှိလားရှင့် ။ ဘယ်ကအဖွဲ့တွေလဲနော် ။


ဖြေ။ ။ဘယ်အဖွဲ့မှမရှိသေးဘူး။ ကျနော်တို့ကျောက်မဲက ဘိုးဘွားကူညီစောင့်ရှောက်ရေးအသင်းရယ် ကျောက်မဲလူထုရယ် တတ်နိုင်သမျှ အစားအသောက်တွေ အဝတ်အထည်တွေနဲ့ စောင်တွေသွားပေးပါတယ်။ မနေ့က တနေ့လုံးနဲ့ ဒီနေ့မနက်စာသွားပြီးထောက်ပံ့ပြီးပြီ။ အခုလည်း ကျောက်မဲလူထုက ကား ၁၀ စီး လောက်နဲ့ ရွာမှာပိတ်မိနေတဲ့သူတွေကို သယ်ထုတ်ဖို့ ထွက်သွားနေပါတယ်။ တော့ဆန်၊ ပန်စံနဲ့ ကန့်ကန်မှာ ၁၅၀၀ လောက်ကျန်နေတယ်။

မေး ။ ။ ဒီစစ်ဘေးရှောင်တွေ အဓိကလိုအပ်နေတာ ၊ အဓိက ဖြစ်ချင်နေတာတွေက ဘာတွေလဲ ။ တကယ်လို့ အဖွဲ့အစည်းတွေက သွားပြီးအကူအညီပေးမယ်ဆိုရင်ပေါ့ ။


ဖြေ ။ ။ အခု သူတို့ထွက်ပြေးလာတာ အဝတ်တထည်ကိုယ်တခုဘဲလေ ။ ဘာမှမရလာဘူး ။ ရှင်းရှင်းပြောရင် အဓိက စစ်ပွဲကိုမလိုလားကြဘူးပေါ့ ။ ထွက်ပြေးတဲ့သူတွေကိုလည်း တအာင်းတပ်ကပြောတယ် ။ အိမ်ကို တံခါးသော့မခတ်ခဲ့နဲ့ ။ သော့ခတ်တဲ့အိမ်ကိုမီးရှို့မယ်တဲ့ ။ သဘောကတော့ တံခါးမခတ်ထားရင် သူတို့လိုတာ တက်ယူနိုင်တယ်လေ ။ ရွာသားတယောက်က ပြောပြတာက  ရွာမှာရောင်းဖို့ ဆန်အိတ် ၁၀၀ လှောင်ထားတာ တရက်တည်းနဲ့တအာင်းတပ်က လာသိမ်းသွားတယ် - အဲလိုလဲရှိတယ် ။ ကုန်စုံဆိုင်တွေလည်း ဝင်မွှေခံရ တယ် ။ ဆန် ၊ ဆီ ၊ ဆားယူသွားတယ် ။ ရွာသူတွေကို ရွာလယ်မှာ မုဒိန်းကျင့်တာတွေတောင်ရှိတယ်လို့ ရွာသား တွေ လာပြောပြတယ် ။ အခုတော့ ဆန်ရွာက တရုတ်ဘုံကျောင်းမှာ ရွာသား ၂၀၀၀  လောက် ပိတ်မိနေတယ် ။


မေး ။ ။ ဘယ်ရွာက ရွာသားတွေလဲရှင့်အဲဒီမှာပိတ်နေတာက ။


ဖြေ ။ ။ တော့ဆန်အုပ်စုတစုလုံး ၊ မန်းကွန်းတအုပ်စုလုံး ပိတ်မိနေတယ် အဲ့ဒီတရုတ်ဘုံကျောင်းမှာ ။ ပြီးတော့ ပန်စံတရွာလုံး ၊ ပန်ကောန်ရွာ ၊ ကန့်ကန်ရွာတွေတော့ ကြိုကြားကြိုကြားရောက်လာနေတယ် ကျောက်မဲကို ။


မေး ။ ။ အဲဒီတော့ ဒီကိစ္စနဲ့ပတ်သက်ပြီး ဆရာ့အနေနဲ့ ဘယ်လိုပြောချင်ပါသလဲရှင် ။


ဖြေ ။ ။ ကျနော့်အနေနဲ့တိုက်တွန်းချင်တာက - အခုလို ရွာသားတွေ ဓါးစာခံဖြစ်နေရတာ ၊ အနိုင်ကျင့်ခံနေရ တာကို သျှမ်းပြည်သားတွေ ငြိမ်းချမ်းစွာနေနိုင်ဖို့ ရည်ရွယ်ပြီး ငြိမ်းချမ်းရေးလက်မှတ်ရေးထိုးထားတဲ့ ရှမ်းပြည်တပ်မတော်အနေနဲ့ရော ၊ သျှမ်းပြည်သားတွေ စစ်ဘေးစစ်ဒဏ်ခံရမှာစိုးလို့ အစိုးရတောင်းဆိုမှုကို လိုက်လျောတပ်ဆုတ်ပေးထားတဲ့ သျှမ်းပြည်တပ်မတော်အနေနဲ့ရော ဒီကိစ္စကို အလေးအနက်ထားစေချင် တယ် ။ လူထုအရေး မိဘပြည်သူအရေးကို အလေးထားစေချင်တယ် ။ လက်နက်မဲ့ရွာသားတွေ အနိုင်ကျင့်ခံနေ ရပါတယ် ။ ဘာလုပ်သင့်သလဲဆိုတာ မြန်မြန်ဆန်ဆန် ဝိုင်းဝန်းကူညီလုပ်ဆောင်ပေးပါ ။  NCA စာချုပ်ကြောင့် အထက်အမိန့်ချည်းစောင့်နေမယ်ဆိုရင် သျှမ်းပြည်သားတွေ သေကုန်လိမ့်မယ် ။ မဟာမိတ်တွေရဲ့ခွင့်ပြုချက် တွေကိုချည်း စောင့်နေရင် ရွာသားတွေ သေကုန်လိမ့်မယ်လို့ ပြောချင်ပါတယ် ။


သျှမ်းပြည်မြောက်ပိုင်းမှာ တအာင်းတပ်နဲ့  RCSS တို့ဟာ ပြီးခဲ့တဲ့ နှစ်ကုန်ပိုင်းကတည်းက ပစ်ခတ်တိုက်ခိုက်မှု တွေ ဖြစ်ပွါးနေခဲ့တာ ဆွေးနွေးညှိနှိုင်းမှုမရှိနိုင်သေးဘဲ ကနေ့ထိ တိုက်ပွဲတွေ ဆက်လက်ဖြစ်ပွါးနေခဲ့တာ ဖြစ်ပါတယ် ။


ဆက်ဖတ်ရန်


သို့- တာဝန်ခံ အယ်ဒီတာ



သျှမ်းသံတော်ဆင့်သတင်းဌာန

သျှမ်းပြည်နယ်ဝန်ကြီးချုပ်နှင့် ဝန်ကြီးတချို့တို့၏ အလွှဲသုံးစားပြုမှုများအား သျှမ်းသံတော်ဆင့်သတင်းတွင် ဖော်ပြပေးနိုင်ပါရန် မေတ္တာရပ်ခံပေးပို့ အပ်ပါသည် ။


သျှမ်းပြည်နယ်ဝန်ကြီးချုပ်နှင့် ၀န်ကြီးတချို့တို့၏ အလွှဲသုံးစားမှုများ


၂၀၁၅ ခုနှစ် ပါတီစုံ ဒီမိုကရေစီ ရွေးကောက်ပွဲတွင် အနိုင်ရရှိခဲ့သည့် အချို့သော ပြည်ခိုင်ဖြိုးအမတ်များမှာ ယခု လက်ရှိ သျှမ်းပြည်နယ် အစိုးရအဖွဲ့တွင် တာဝန်ထမ်းဆောင်လျှက် ရှိကြပါသည် ။ ၄င်းတို့သာ နောင်လာ မည့် (၅) နှစ်သက်တမ်းတွင်လည်း အစိုးရအဖွဲ့တွင်သာ ဆက်လက် ပါဝင်နေမည်ဆိုပါက သျှမ်းပြည်နယ် အနာဂါတ်အတွက် အတော်ပင်ရင်လေးမိပါသည် ။


အဘယ့်ကြောင့်ဆိုသော် ၂၀၁၄ ခုနှစ် ဇွန်လအတွင်း ဖြစ်ပွားခဲ့သော တရုတ်ပြည်ပို့မည့် ကျွဲ ၊ နွား များ သျှမ်း ပြည် နယ် ဖြတ်ကျော် သယ်ဆောင်ခွင့်ကို သျှမ်းပြည်နယ်ဝန်ကြီးချုပ်၏ လက်မှတ်အတုဖြင့် အလွှဲသုံးစား ပြုခဲ့သည့် ၀န်ကြီးတစ်ဦးမှာလည်း ၂၀၁၅ ခုနှစ်ရွေးကောက်ပွဲတွင် ပြည်ခိုင်ဖြိုးပါတီမှ ၀င်ရောက်ယှဉ်ပြိုင် အနိုင်ရရှိခဲ့ပါသည် ။


အဆိုပါ ကိစ္စရပ်အား သျှမ်းပြည်နယ်အစိုးရ တစ်ဖွဲ့လုံးနှင့် ပြည်နယ်အထွေထွေ အုပ်ချုပ်ရေးဦးစီးဌာနတို့မှ သိရှိပါ လျှက်နှင့် ပြည်နယ်ဝန်ကြီးချုပ်က ၄င်းဝန်ကြီးအား ထိရောက်စွာ အရေးယူခြင်းမရှိပဲ နောက်နောင် အဆိုပါကိစ္စမျိုး ထပ်မံ မပြုလုပ်တော့ရန် ခံဝန်လက်မှတ်ထိုးခြင်းလောက်နှင့်သာ အဆုံးသတ်ခဲ့ကြောင်း သိရှိခဲ့ရပါသည် ။


သျှမ်းပြည်နယ် ၀န်ကြီးချုပ်မှ အဆိုပါကိစ္စအား နိုင်ငံတော် သမ္မတရုံးသို့ တင်ပြခဲ့ခြင်း ရှိမည်ဟု မထင်ပါ ။


၎င်းဝန်ကြီး (ဦး - - ညွှန့်) နှင့်တကွ သျှမ်းပြည်နယ် ၀န်ကြီးချုပ် ဦးစဝ်အောင်မြတ် ၊ ယခင် နယ်လုံဝန်ကြီး ယခု အနိုင်ရ ပြည်ခိုင်ဖြိုးအမတ် ဦးအောင်သူ တို့သည် ၄င်းဖြစ်စဉ်တွင် လက်မှတ်ရေးထိုးခဲ့ကြသည် ဟု ကြားသိရပါသည် ။ အဆိုပါကိစ္စမှာ နိုင်ငံတော် သမ္မတနှင့်တကွ မြန်မာနိုင်ငံအတွင်းနေ ပြည်သူအားလုံးကို ဖုံးကွယ်လိမ်ညာ သည့် လုပ်ရပ်ဖြစ်ကြောင်း ရှုမြင်မိပါသည် ။


ထို့အပြင် သျှမ်းပြည်နယ် ၀န်ကြီးချုပ်၏ ခွင့်ပြုချက်ဖြင့် တောင်ကြီးမြို့ ဟိုပုံးဘက်အထွက် (၂) မိုင် ဓါတ်ဆီ ဆိုင်၏ ညာဖက်တွင်လည်း နိုင်ငံပိုင် သစ်တောကြိုးဝိုင်းကို သိမ်းပိုက်ပြီး အိမ်ရာကွက်များ ဖေါ်ဆောင်ကာ သျှမ်းပြည်နယ် အစိုးရအဖွဲ့ဝင်များအား ဝေမျှထားကြောင်း ၊ ကျန်အကွက်ပိုများကို ရောင်းစားခဲ့ကြောင်း လည်း ကြားသိရပါသည် ။


အဆိုပါအကွက်များတွင် ၀င်ဒါမီယာကဲ့သို့ အဆောက်အဦများ လမ်းများ ကောင်းမွန်စွာ ဆောက် လုပ်ထား ပါသည် ။ ယခုလက်ရှိ သျှမ်းပြည်နယ် ၀န်ကြီးချုပ်သည် (၅) နှစ်တာသက်တမ်းအတွင်း သျှမ်းပြည်နယ် အကျိုး ၊ ပြည်နယ်တွင်း နေ ပြည်သူများအကျိုး ကောင်းမွန်တိုးတက်အောင် ထိထိရောက်ရောက် ဆောင် ရွက်နိုင်ခဲ့ခြင်းမရှိပါ ။


၎င်းနှင့် ၄င်း၏ဆွေမျိုးများ၊ ၄င်းနှင့် မကင်းရာမကင်းကြောင်း ကုမ္ပဏီများသာလျှင် ဟိုတယ်လုပ်ငန်းများ ၊ လမ်း တံတားလုပ်ငန်းများနှင့် အခြားသော လုပ်ငန်းများစွာလုပ်ကိုင်ကာ ကြီးပွားချမ်းသာလာကြသည်ကို မျက်ဝါး ထင် ထင်တွေ့ရှိနေရပါသည် ။


ထိုကဲ့သို့ သျှမ်းပြည်နယ် အကျိုးမကြည့်ပဲ ကိုယ်ကျိုးစီးပွားကိုသာ ရှေးရှုသည့် ပြည်နယ်ဝန်ကြီးချုပ်နှင့် အလိုတူ အလိုပါ ၀န်ကြီးတချို့ကဲ့သို့သော ပြည်ခိုင်ဖြိုးအမတ်များသာ နောင် (၅) နှစ်သက်တမ်းတွင်လည်း သျှမ်းပြည်နယ် အစိုးရအဖွဲ့တွင် ဆက်လက်ပါဝင် ဦးဆောင် နေမည်ဆိုပါက သျှမ်းပြည်နယ် နှင့် ပြည်နယ် တွင်း နေပြည်သူ များသာ များစွာထိခိုက်နစ်နာမည် ဖြစ်ကြောင်း ပြည်နယ်သူ ပြည်နယ်သားများကိုယ်စား တင်ပြလိုက်ရပါသည် ။


                                                                                               သျှမ်းပြည်သားတစ်ဦး


ဆက်ဖတ်ရန်


သျှမ်းပြည်နယ်လွှတ်တော်အကြီးအကဲများ ပြည်ခိုင်ဖြိုးပါတီနေရာရ



ဒုတိယအကြိမ် သျှမ်းပြည်နယ်လွှတ်တော် ပထမပုံမှန်အစည်းအဝေးကို ဖေဖော်ဝါရီ ၈ ရက် သျှမ်းပြည်နယ်မြို့ တော်တောင်ကြီးမြို့တွင် စတင်ကျင်းပရာ သျှမ်းပြည်နယ်လွှတ်တော် သဘာပတိနေရာ ၊ ဥက္ကဌ နှင့် ဒုတိယ ဥက္ကဌ နေရာတို့၌ ပြည်ထောင်စုကြံ့ခိုင်ရေး နှင့် ဖွံ့ဖြိုးရေးပါတီ (USDP) မှနေရာရထားကြောင်း သိရသည် ။


သျှမ်းပြည်နယ်လွှတ်တော်  သဘာပတိအဖြစ် လောက်ကိုင် မဲဆန္ဒနယ်အမှတ် (၁) ဦးအောင်သန်းထွဋ်  ကရွေးချယ်ခံရပြီး ၊ ဥက္ကဌအဖြစ် ကျိုင်းတုံမြို့နယ် မဲဆန္ဒနယ် အမှတ် (၁) စိုင်းလုံးဆိုင် မှရွေးချယ်ခံရ သည်ဟုဆိုပါသည် ။ ဒုဥက္ကဌအဖြစ် ရွာငံ မဲဆန္ဒနယ် အမှတ် (၂) လက်ရှိ သျှမ်းပြည်နယ် ဝန်ကြီးချုပ် စဝ်အောင်မြတ် မှရွေးချယ်ခံရပါသည် ။


သျှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD)  ၏ သီပေါမြို့နယ် မဲဆန္ဒနယ်အမှတ် (၁) မှ နန်းစန်းစန်းအေး က “ ဒီနေ့ လွှတ်တော်မှာတော့ အဓိက သဘာပတိ တွေ ဥက္ကဌတွေ ဒုဥက္ကဌတွေ ရွေးတာပေါ့ ဝင်ရွေးတာတော့ ကျမတို့ ကျားခေါင်းပါတီတွေလည်း  ၃ နေရာ စလုံး ဝင်ရောက်အရွေးခံ ခဲ့တယ် ။ ဒါပေမယ့် ကြံ့ခိုင်ရေးပါတီ ကို မနိုင်ဘူး ” ဟု ပြောသည် ။


ဆန္ဒမဲပေးနေရာတွင်လည်း ဒီမိုကရေစီအင်အားစုများဖြစ်ကြသည့် အမျိုးသားများ ဒီမိုကရေစီအဖွဲ့ချုပ် ( NLD ) နှင့် သျှမ်းတိုင်းရင်းသားများ ဒီမိုကရေစီအဖွဲ့ချုပ် ( SNLD) ကျားခေါင်းပါတီ တို့ ပေါင်းစည်းမှုအင်အား သည်လည်း ကြံ့ခိုင်ရေး ပါတီ (USDP) ၏ တစ်ဝက်သာရှိကြောင်း နန်းစန်းစန်းအေး ကပြောသည် ။


“ ဘာကြောင့်မနိုင်တာလဲ ဆိုရင် မဲပေးတဲ့အခါမှာ ကျမတို့ ပါတီ နဲ့  NLD ဘဲရှိတာ ။ ကျမတို့ နှစ်ပါတီပေါင်းတာမှ ဆန္ဒမဲ ၄၆ မဲဘဲရှိတယ် ။ ကြံ့ခိုင်ရေးတွေ တပ်မတော်သားတွေ တိုင်းရင်းသားပါတီငယ်တွေက  ၈၈ မဲရှိပြီလေ ” ဟု ၄င်းက ပြောသည် ။


ဒုတိယအကြိမ် သျှမ်းပြည်နယ်လွှတ်တော် ပထမပုံမှန် အစည်းအဝေးတွင် သျှမ်းပြည်နယ် လွှတ်တော် အမတ် ၁၃၇ ဦး အနက် တပ်မတော်သား ၃၄ ဦး ပါရှိကြောင်း သိရသည် ။


ဆက်ဖတ်ရန်


ဗုဒ္ဓသာသနာ - နိုင်ငံတကာ စာတမ်းဖတ်ပွဲ တောင်ကြီးမြို့ ဗုဒ္ဓတက္ကသိုလ်တွင် စတင်ကျင်းပ



An International Seminar on “ Buddhism, Higher Education and Vision ” ဗုဒ္ဓသာသနာ ၊ အဆင့်မြင့်ပညာရေးနှင့် အမြော်အမြင်  နိုင်ငံတကာ စာတမ်းဖတ်ပွဲ - ဆယ်မီနာကို တောင်ကြီးမြို့ ဗုဒ္ဓတက္ကသိုလ်တွင် ကျင်းပ ခဲ့သည် ။


ဆယ်မီနာကို ဖေဖော်ဝါရီလ ၆ ရက် နံနက် ၈ နာရီတွင်စတင်မည်ဖြစ်ပြီး ညနေ ၅ နာရီအထိကျင်းပမည်ဖြစ် ကြောင်း အစီအစဉ်တွင်ပါရှိပါသသည် ။ ပြည်တွင်းပြည်ပမှ စာသင်သံဃာတော်များ ၊ လေ့လာသူများ ၂၀၀ ၀န်းကျင် တက်ရောက်ခဲ့သည် ။


သျှမ်းပြည်သံဃာ့နာယက ဒေါက်တာပညာနန္ဒနှင့် သျှမ်းပြည်နယ် ဗုဒ္ဓတက္ကသိုလ်ဦးဆောင်တည်ထောင်သူ ဒေါက်တာဓမ္မသာမိတို့က နမောတဿ ၃ ကြိမ်ရွတ်ဆိုကာ ဆယ်မီနာ ဖွင့်ပေးခဲ့သည် ။ သျှမ်းပြည်နယ် သာသနာရေးဝန်ကြီး ဦးစိုးဝင်းလည်းတက်ရောက်အမှာ စကားပြောကြား ကြောင်း ဆိုပါသည် ။


ပြည်တွင်းပြည်ပမှ ပညာရှင်သံဃာတော် ၆ ပါးက ဗုဒ္ဓဘာသာတက္ကသိုလ်နှင့် သာသနာတော် ပျံ့ပွါးရေး ၊ သီရိလင်္ကာနိုင်ငံမှ ပါဠိနှင့်ဗုဒ္ဓတက္ကသိုလ် ၊ အမေရိကန်နှင့် ဥရောပနိုင်ငံများမှ ဗုဒ္ဓဘာသာဆိုင်ရာဘာသာရပ်ပို့ချ မှုအစရှိ စာတမ်းများကို  အင်္ဂလိပ်ဘာသာဖြင့် ဖတ်ကြားသွားခဲ့ကြောင်း သိရသည် ။


ဖေဖော်ဝါရီလ ရ ရက် သျှမ်းပြည်အမျိုးသားနေ့တွင်မူ ဘုရားဖြူရပ်ကွက် ဗောဓိကုန်းရှိ ဗုဒ္ဓတက္ကသိုလ်ဖွင့်ပွဲ ကျင်းပမည်ဖြစ်ပါသည် ။


ဆက်ဖတ်ရန်


SNLD ဥက္ကဌကိုယ်တိုင် ဟိုင်းပါ စစ်ဘေးရှောင်စခန်း သို့သွားရောက်ထောက်ပံ့



သျှမ်းတိုင်းရင်းသားများဒီမိုကရေစီအဖွဲ့ချုပ်ဥက္ကဌ ခွန်ထွန်းဦးဦးဆောင်သည့် ဗဟိုကော်မတီအဖွဲ့သည် ကြာသပတေးနေ့ ကနေ့မနက်က မိုင်းရှူးမြို့နယ်ရှိ စစ်ဘေးဒုက္ခသည်များခိုလှုံနေထိုင်ရာ ဟိုင်းပါရွာ သို့ရောက်ရှိကာ ကူညီေ ထာက်ပံ့ရေးပစ္စည်များနှင့်အတူ အားပေးစကားများပြောခဲ့ကြောင်း သိရပါသည် ။


ဖေဖော်ဝါရီလ ၄ ရက်နေ့ ခွန်ထွန်းဦး၏ မိုင်းရှူးမြို့နယ် ခရီးစဉ်အတွင်း စစ်ဘေးရှောင်များအတွက် သျှမ်းပရဟိတအသင်းများမှ ပေးပို့လှူဒါန်းလာသော ရိက္ခာ လူသုံးကုန် ပစ္စည်း များ နှင့် ဆေးဝါးများကိုလည်း စစ်ဘေးရှောင် စခန်းနေ လူထု ၁၀၀၀  ထံ ပေး အပ်ခဲ့ပြီး SNLD ပါတီမှလည်း ထောက်ပံ့ပစ္စည်း များပေးအပ်ခဲ့သည်ဟု လိုက်ပါသည့် ရွေးကောက်ပွဲ အနိုင်ရာလွှတ် တော် အမတ်တဦးက ပြောသည် ။


" မနက်ဖြန်မှာ လူထုတွေ့ဆုံပွဲလုပ်မယ်။ မိုင်းရှူးမြို့တွင်းမှာဘဲ ။  ဒုက္ခသည်တွေ  ရင် ဖွင့်ပြောဆိုတာကို နားထောင်မယ် ။ " ဟု ခရီးစဉ်တွင် လိုက်ပါသွား သည့် နမ့်စန်မြို့နယ် ပြည်နယ် လွှတ်တော်အမတ် စိုင်းသူရိန်ဦး က ပြောသည် ။


အစိုးရ တပ်မတော်နှင့် သျှမ်းပြည်တပ်မတော် မြောက်ပိုင်း SSPP/SSA တို့မှာ အပစ်ခတ်ရပ်စဲထားပြီဖြစ်သော်လည်း နှစ်ဘက်တပ်များမှာ ရွာများအနီးတွင် ရှိနေခြင်း ၊ နှစ်ဘက်တပ်များ ကောင်းကောင်းမွန်မွန် ပြန်လည် ဆုတ်ခွာပေးခြင်း မရှိသေးခြင်း ၊ စစ်ဘေးရှောင်အချို့၏ နေအိမ်များမှာ ပျက်စီးကုန်ခြင်းနှ င့် ကောက်ပဲသီးနှံများ ပျက်စီးကုန်ခြင်း တို့ကြောင့် စစ်ဘေးရှောင် ဒုက္ခသည်စခန်းများတွင် စစ်ဘေးရှောင် ၁၀၀၀ ကျော် ဆက်ရှိနေဆဲဖြစ်သည် ။


ဆက်ဖတ်ရန်


နမ့်ဆန်မြို့တွင် မီးအကြီးအကျယ် လောင်ကျွမ်းနေ



သျှမ်းပြည်မြောက်ပိုင်း  ပလောင်ကိုယ်ပိုင်အုပ်ချုပ်ခွင့်ရဒေသ ဗဟိုရုံးစိုက်ရာ နမ့်ဆန်မြို့  လယ် မင်္ဂလာရပ်ကွက်တွင် ယနေ့ မွန်းလွဲ တနာရီခန့်မှ ညနေ ၄ နာရီအထိ မီးဆက်တိုက် လောင်ကျွမ်း နေသည်ဟုသိရသည် ။


ကားလမ်းကျဉ်းသည့်အတွက် မီးသတ်ယာဉ် မဝင်နိုင်ဘဲ မီးဆက်တိုက် လောင်နေခြင်းဖြစ်၏ ။


မီးကူညီငြိမ်းသတ်နိုင်ရန်အတွက် လားရှိုး ၊ နမ့်တူ ၊ ကျောက်မဲ တို့မှ မီးသတ်ယာဉ်များလည်း နမ့်ဆန်မြို့သို့ ဦးတည်နေသည်ဟု ဆိုသော်လည်း နမ့်ဆန်သို့ရောက်ရန် အချိန်ကြန့်ကြာသဖြင့်ဆုံးရှုံးမှု များပြားနိုင်ကြောင်း ၊ လက်ရှိသတင်းတင်ချိန်အထိ ဆုံးရှုံးမှုတန်ဖိုးအတိအကျမသိရသေးကြောင်း မီးကူညီ ငြိမ်းသတ်သူ စိုင်းကျော်သန်းက ပြောသည် ။


ဆက်ဖတ်ရန်


 
© 2012 All Rights Reserved | Asean Celebrity | Fonts @ AtFonts | Free Templates