ကျောက်မဲမြို့ အချုပ်ခန်းမှ အချုပ်သား ၇ ဦး ထွက်ပြေး သုံးဦး ပစ်သတ်ခံရ



သျှမ်းပြည်မြောက်ပိုင်း ကျောက်မဲခရိုင် ကျောက်မဲမြို့ မြို့မရဲစခန်းမှ အချုပ်သား ၇ ဦး ထွက်ပြေးရာ သေနတ်ပစ်ဖောက် ဖမ်းဆီးမှုကြောင့် သုံးဦးသေဆုံးကြောင်း သက်ဆိုင်ရာထံမှ သိရပါသည်။

အကျဉ်းသားများ သံဇကာ ဖောက်ဖျက်၍ ထွက်ပြေး

“တာဝန်ကျရဲတွေ အမျိုးသားအချုပ်ခန်းမှာ စောင်ထုပ်သွားချပေးတဲ့အချိန်ပေါ့။ အချုပ်ခန်းတံခါးဝ ကနေ စောင်တွေသွင်းပေးနေတုန်း အချုပ်သားတွေက တံခါးကို အတင်းတွန်းပြီး ထွက်ပြေးတယ်” ဟု ရဲအသိုင်းအဝိုင်းနှင့် နီးစပ်သူတစ်ဦးက ပြောပါတယ်။

ဂျူလိုင်လ ၂၆ ရက် ည ၆ နာရီခန့် အမျိုးသားအချုပ်ခန်း၌ တာဝန်ကျရဲများဖြစ်ကြသော ဒုရဲအုပ် ထွန်းခိုင်စိုး၊ ရဲတပ်ကြပ် ခင်လှဌေး၊ ရဲဒုတပ်ကြပ် နောင်နောင်တို့မှ  စောင်ထုပ်များကို အချုပ်ခန်း တံခါးဝမှ သွင်းပေးစဉ် အချုပ်သား(၇)ဦးက အတင်းတွန်းထွက်ကာ  ရဲ တစ်ဦးအား ထိုးနှက်ခဲ့ ကြောင်း၊  တာဝန်မှူးဒုရဲအုပ်နှင့် ကင်းမှူးရဲတပ်ကြပ်တို့က  အဆိုပါအချုပ်သားအားဖမ်းဆီး ရန်ကြိုး ပမ်းစဉ်  အချုပ်ခန်းအပြင်တွင် ရောက်ရှိနေနှင့်သော အချုပ်သား ၆ ဦးကလည်း ဝိုင်းဝန်းထိုးကြိတ် ကြောင်း၊ အချုပ်ခန်းအပြင်ဘက် ဘေးပတ်လည်ရှိ ကာရံထားသော သံဇကာအား ဖျက်ပြီးထွက် ပြေးကြ ကြောင်း ရဲထုတ်ပြန်ချက်၌ ရေးသားထားသည်။

အချုပ်သားများက ရဲတပ်ဖွဲ့များအား ခုခံရိုက်နှက်ထွက်ပြေးသောကြောင့် စခန်းမှူးအပါအ ဝင် ရဲတပ်ဖွဲ့ဝင် ၅ ဦးဒဏ်ရာရရှိကြောင်း လည်း ဖော်ပြထားပါသည်။

“သေနတ်နဲ့ပစ်တော့ အချုပ်သား ၃ ယောက်သေပြီး ၄ ယောက် ဒဏ်ရာရတယ်။ အချုပ်သားတွေ ရိုက်နှက်လို့ စခန်းမှူးတော့ နံရိုးအားလုံး ကျိုးသွားတယ်။ ထွက်ပြေးတဲ့ အချုပ်သား ၇ ယောက်စလုံး မူးယစ်ဆေးဝါးမှုနဲ့ တရားရုံးမှာ အမှုရင်ဆိုင်နေရတဲ့သူတွေပါ” ဟု အဆိုပါ ရဲအသိုင်းအဝိုင်းနှင့် နီးစပ်သူက ပြောပါတယ်။

အချုပ်ခန်း ကင်းတာဝန်ကျ ရဲတပ်ဖွဲ့ဝင်များကလည်း M-၂၂  သေနတ် ၁ လက်၊ HK –၃၃  သေနတ် ၂ လက် ဖြင့် ပစ်ခတ်ဖမ်းဆီးခဲ့ခြင်းဖြစ်ကြောင်း ဆို၏။

သေဆုံးသူ ၃ ဦး၊ ဒဏ်ရာရရှိသူ ၄ဦးနှင့် ဒဏ်ရာရ ရဲတပ်ဖွဲ့ဝင် ၅ ဦးတို့ကို ရဲဆေးစာဖြင့် ကျောက်မဲ ဆေးရုံသို့ ပို့ဆောင်ထားကြောင်း၊ ဒဏ်ရာအပြင်းအထန်ရရှိသော စခန်းမှူးမှာ စိုးရိမ်ရသဖြင့် ကျောက်မဲ ဆေးရုံမှ မန္တလေးဆေးရုံသို့ ပြောင်းရွှေ့ကုသမှု ခံယူလျှက်ရှိကြောင်း၊ ထွက်ပြေးအချုပ် သားများအား ကျောက်မဲမြို့မရဲစခန်းက (ပ)၃၉/၂၀၁၄၊ ပြစ်မှုပုဒ်မ ၃၀၇/၃၃၃/၂၉၄/၂၂၄/၁၁၄ အရ အမှုဖွင့် အရေးယူထားကြောင်း သိရှိရ ပါသည်။




 
© 2012 All Rights Reserved | Asean Celebrity | Fonts @ AtFonts | Free Templates